రసం లేదా చారు దక్షిణభారతీయ వంటకం. ముఖ్యంగా తెలుగు ఇళ్ళలో దాదాపు  ప్రతిరోజూ కనిపించే వంటకం. రసం  వేరు వేరు పద్దతులలో చేస్తారు.  చెప్పాలంటే ఒక్కో చేతిలో ఒక్కో రుచి వస్తుంది. అయినా కూడా ప్రతిదీ ప్రత్యేకమైన రుచిలో ఉంటుంది. అలా రసం మన ఆహారంలో ముఖ్యపాత్ర  పోషిస్తోందని చెప్పక తప్పదు.

రసం / చారు రకాల్లో టమాటచారు ప్రత్యేకమైనది. ఇది పుల్లగా మరియు స్పైసీగా  ఉంటుంది. వివిధ రకాల మసాలా దీనుసులని వేయించి, చేసిన పొడితో తయారుచేస్తారు. వేడి వేడి అన్నంలో కలుపుకుని తింటారు. ముఖ్యంగా జ్వరం కానీ, అనారోగ్యంగా ఉన్నప్పుడు పిల్లలకి , పెద్దలకి  టమాటా రసంతో పెడతారు.

మా పెద్దమ్మ టమాట చారు చాలా టేస్టిగా చేసేవారు. ఎవరికైనా జ్వరం అంటే మా పెద్దమ్మ టమాట చారు చేయాల్సిందే. తాను చారు చేస్తుంటే, వచ్చే ఆ వాసనకి  చుట్టుపక్కన వాళ్ళకి కూడా నోరూరేది. ఇప్పటికీ టమాటా చారు అంటే తనే గుర్తొస్తుంది.

ఈ రసంలో పప్పుపొడి ఉపయోగించలేదు. మరింత చిక్కదనం కావాలనుకుంటే కందిపప్పు పొడిని  కలుపుకోవచ్చు. ఇది చాలా తేలికగా చేయగలిగిన రుచికరమైన మరియు ఆరోగ్యకరమైన వంటకం. టమాట రసం ఎలా చేయాలో తెలిపే వీడియో మరియు వివరణ స్టెప్ బై స్టెప్ లో చూడండి.